غزل

احيانا باكون ماشية في حالي و يشدني شئ يخليني اتعلق بيه
فيه حاجات ممكن احصل عليها او املكها لكن فيه حاجات اكيد صعب امتلاكها
ممكن ااقع في حب فستان شنطة حذاء و لو مش اشتريته بيكون معلق في دماغي قوي
بطبعي مش عندي حب امتلاك لكن معظم اشيائي اشتريها بحب من اول نظرة
حتي بيتي لما اشتريته حسيت بحب ليه مع ان طبعا فيه عيوب خارجيه مثل الضوضاء احيانا
لكن ده بسبب تأثير الاخرين و حبي للبيت بيخليني اهتم بيه قوي
شغل التجميل عمره ما كان في دماغي و لا بالي بس وقعت في حب الفرشاة و الالوان و رؤيه بسمة علي وجه امرأه
احيانا بتمر باشخاص عاديين و ممكن ااقل من العاديين و احسن اني عاوزة اضحك لهم او اكلمهم ساعات بأقدر لما بيكون مودي كويس و ساعات بأخجل
احلي ناس شفتهم بجد و فرحوا قوي لما قربت منهم ناس في مكان مش ممكن كان يخطر علي بالي - خلف جامع الحسين في الجماليه هناك الناس بسطاء قوي و خاصة العجائز و ابتسامتهم حلوة حتي الاطفال رغم فقرهم بس الضحكة ايه من القلب
انا باعترف طبعا ان اللي عرفني علي المكان دة واحد اجنبي و استغرب اني عمري ما زرت مكان زي دة لان عادة بنكون علي القهاوي اللي جنب الحسين بس
اكثر شئ بتشدني قوي و تخليني اغازله بجد طفل صغير بيضحك و بيشاور ليا بايديه ساعتها ممكن اديله عمري بس يضحك علي طول و يمكن دي من اكثر الحاجات اللي باحبها في ابني انه بيصحي من النوم مبتسم
حاجات و حاجات بيت قديم ... عيون جميله.. ضحكة بريئة .. البحر .. السما بالليل بين الجبال نوع جميل من الغزل