Tuesday, November 11, 2008

يا بنت يأم المريله كحلي

يا بنت يأم المريله كحلي

يا شمس هاله و طاله من الكوله

لو قلت عنك في الغزل قوله

ممنوع عليا و لا مسموحلي

دا انا احب اقول الشعر في الحلوين

و الحلو اقوله يا حلو في عيونه

و لو ابتديت بشفافيك النونو

مايكفنيش فيهم سبع دوواين

يا ملاك يا حنيه يا ست الكل

يعجبني توهانك في احلامك

يعجبني شد الخصر بحزامك

يعجبني اخدك للكتب في الحضن

راحوا الصبايا و الصبايا جم

اجمل ما فيهم مين غير بنتي

و اجمل ما فيك يا بنتي ان انتي

في عنيكي من نينتي حنان الأم


فاكرين الكلمات دي لصلاح جاهين و غناها محمد منير .. كلمات جميله رقيقه بتوصف البنت و جمالها و رقتها .. بنت الزمن الجميل .. بنت العقل و الحكمه .. بنت الأدب و الاخلاق .. الأصول و التقاليد من اداب الشارع لاحترام الكبير

النهاردة بقي انا بأحمد ربنا قوي ان مش عندي بنت و الا كان عقلي طار أو سبت حياتي و شغلي و فضلت ماشيه وراها اشوف اخر صيحات المصايب

البنت في السبعينات – يعني الزمن اللي اتولدت - فيه كانت بتقرأ – رغم عدم وجود مهرجان القراءة للجميع و لا ماما سوزان في التليفزيون بتقرأ للاطفال

البنت في ذلك الوقت كانت بتلعب رياضة و لا تخجل من لبس مايوة سباحة – مش مايوة شرعي اللي ما هو شرعي و لا حاجه لانه بيفصل الجسم اكثر – و ألعاب اخري كثيرة رغم ان الملاعب كانت غير متطورة مثل الأن

البنت في الوقت الجميل كانت بترسم و تعزف و بتتعلم شغل الأبرة و الاقتصاد المنزلي

البنت اللي كانت تتأخر برة لازم اخوها يجيبها أو ابوها رغم اننا كان عادي نلبس شورت و بادي او فستان قصير او جوب ميني جيب.

البنت فيها حنان و رقة و صوتها مش عالي بس مش معني كدة انها مسلوبه الارادة

كل دة اتحول في خلال عشرين سنه من فترة طويله باشوف البنات امام المدارس ووجوههم مرسومه بمكياج كامل و الزي المدرسي ضيق جدا و لا احترام للمدرسه

لو سألت بنت في الصيف بتقرأي ايه تبص لك من فوق لتحي و ترفع حاجبها و تقول قرأة ايه ياطنط احنا في اجازة

الملاك الحنيه انقلبت لشيطان اهوج لسانها اطول منها و بتسخر من اهلها غير الكدب و خلافه

اقراص منع الحمل بتعمل ايه في شنط بنات الجامعه .. الزواج العرفي زاد ليه مع ان العريس يادوب بياخد مصروفه

و الا نوعيه تانيه علي النقيض تماما مكعبله في لبسها و مش عارفه تلبس عدل و ماشيه تمتم بكلام مش فاهمه هو دعاء لله و لا دعاء علي الدنيا و عقد الدنيا فيها .

الامهات اللي اتربوا صح راحوا فين ... ليه اهملوا في تربية بناتهم و اولادهم .. باعوا اولادهم لمين ؟ للتبلفزيون و لا الجدات الكبار السن الغير قادرين علي التربيه لانحناء الظهر و عدم القدرة علي الجدال ولا للدادة اللي جاية من بيئة عشوائيه ؟ الكل بيجري وراء زيادة المرتب و الموضة و المكياج و الكلام في التليفون

مش مصدقيني عدوا علي اي مدرسه بنات اعدادي او ثانوي و اتفرجوا و الجامعة معروف عنها كل مصايبها

فينك يا جاهين كنت هاتكتب ايه عن البنت دلوقت ام اماكياج في عز الصبح و سجاير في الحمام و لف في الشوارع بعد المدرسه و بوي فريند و هي لسه في البيضه

بوست بسبب رفد خمس بنات في مدرسه ابني اليوم بيشربوا سجاير في الحمام و الزي المدرسي غير لائق لضيقه و طول فتحة الصدر و فتاتان و طالبان في ثانوي بينهم علاقه غير شرعيه  و العجيب واحدة من هؤلاء الفتيات مش عاجبها و صفعت مدرسه علي وجهها

يا تري بكرة هانشوف ايه ؟ و اللي عندة ولد يا تري هايعرف يتجوز واحدة حلوة من دول؟

 

4 comments:

Anonymous said...

مرحبا عزيزتي
انا معك انه هالجيل الجديد شباب وبنات في ناس كتير منهم ضايع ما بغرف شو بده من هالدنيا وهاد شعور مش بسيط لما الواحد يكون عايش ببلده ومش عارف شو مستقبله ما في خطط للمستقبل كل شي مجهول اذا احنا الاهل تعبانين ومش عارفين بنعمل صح والا غلط هي الحياه صعبه بكل الوطن العربي والعالم يمكن هاد مش مبرر لكل الغلط الي بصير من البنات في هالعمر الوردي
هما والا احنا والا النت والا المحطات الكتيره التافهه والا ايه هو الي عمل فيهم كده ؟؟؟ بصراحه مش عارفه
احنا يظهر ما بنعرف نربي صح يمكن التربيه الصحيحه وقفت عند اهلينا وانتهت واحنا ضعنا بين الجديد والقديم وتوهنا اولادنا معانا
مش عارفه اذا كلامي صح يا ريت حد يحكيلي رايه بهالكلام ؟؟
بس انا بختلف معك انه ولد والا بنت الخطوره واحده والضياع واحد والهم واحد
ربنا يقدرنا نخلي بالنا من اولادنا
ويعدوا بر الامان
ودمتي

عين فى الجنة said...

حقيقى فعلا ؟ دى تبقى مصيبة

Unknown said...

الأهالي بيلمو مصاري عشان هالاولاد يعيشو و يتبغددو

و الأولاد صايرين أشطر؛ في البيت ملائكه و بره الله لا يوريكي!!!

و ع قولة واحد كان معنا أيام الجامعه: "هلأ بدك تقنعيني إنو في أب بيعرف شو بيصير بالشارع؟؟ الأهالي كل همهم يجيبو ربطة الخبز و بس"

مش عارفه يا عزيزتي؛بس إذا أنا عمري صار هالقد و عم بحس حالي مرات تايهه و أنا بعتبر أنو أنا من الجيل اللي لحق التربيه المنيحه اللي بعدي شو يعملو؟؟

soly88 said...

عندك حق الاولاد (بنات وصبيان ) اصبح كل اهتمامهم بالتفاهات ونوعية الموبيل والرنات والعلاقات بينهم شيىء مقزز
ومن سن مبكر جدا يعنى 11و12 سنه
والمدرسه بقى دورها سلبى جدا
اما البيت فلم يعد يستطيع السيطره ووصلنا لمرحلة ان موضوع عذرية البنت بقى موضه قديمه
العيال مولوده عنيها مفتحه