Saturday, April 26, 2008

التاج

مرر هذا التاج لي كل من العزيز شريف و العزيزه شيرين
شكرا لكما و ان كان هذا حقا صعب اجابته
عشرة أشياء عن نفسي
اولا : أحس بالوحدة حتي النخاع .. اعيش وحدي .. امشي وحدي .. اكل معظم الوقت وحدي .. اشتري ملابسي و اخذ قراراتي وحدي كأن هذا قدر .. حتي ان تقرب مني أحد للمساعدة بعد فترة يتبخر الظاهر اني عندي عيب في شخصيتي
ثانيا : بيقولوا قلبي طيب و بسامح بسرعة بس انا متضايقة من كدة مش عاوزة اكون طيبة اتأذيت و اتظلمت كتير بسبب الطيبة دي
ثالثا : عندي مسئوليه كبيرة و مش عارفه هاكملها ازاي .. ربنا يستر
رابعا : انا عصبية و مش متفائلة و علشان أخد اي حاجه في الدنيا لازم روحي تطلع الأول
و مع ذلك انا بأحاول و بأحاول لغاية فين الله أعلم
خامسا : مش عارفه لما اكبر شويه كمان و اعجز هاروح فين و كمان بعد ما قريت بوست شيرين كلمات حمقاء بقيت بافكر بعمق لو مت و مين هايدفني و مين هايقرا الفاتحه عليا ؟ اكيد ما فيش
سادسا : بيقولوا ذوقي في اللبس حلو مع اني مش جميله علي الاطلاق بس باخدها مجامله
سابعا : مش بحب الظلم و لا حد ينكد عليا بقول كفايه كده
ثامنا : بحب القراءة و اتعلم حاجات جدبدة و ساعات بيقولوا عليا مجنونه
تاسعا: نفسي اعيش في مدينه نظيفة و جو هادئ و مش فارق معايا فين المهم الاقي شغل
عاشرا : كنت باحب السفر دلوقتي لا لانه بيزيد احساسي بالوحده
بس خلاص بلاش تريقه علي الكلاكيع من فضلكم ,, انا كده اعمل ايه !!!
أمرر التاج لكل من
بلاك كايرو روز
كاسبر
راجي
بنت القمر
رصيف نمرة خمسة

14 comments:

عين فى الجنة said...

ليه كده بس الحزن اللى مالوش اخر ده؟ ثقى فى رحمة ربنا واصبرى
وبعدين مين قال انك موش جميلة من الواضح انك جميلة والناس بتصرح بكده على كلامك فثقى فى الناس اللى مالهموش مصلحة
وبعدين اشكرك جدا على تمرير التاج لى
وانشاء الله سوف اجاوب عليه وان كنت قد جاوبت عليه عند كنارى قبل كده
تحياتى لكى

بنت القمر said...

someone in life
الكلام عن النفس صعب جدااااااا
انا كنان مشغوله حتي النخاع في حكايه المصطلحات اللي عندي
طب قوليلي انتي رايك فيا
))):
وفين مدونه الماكياج اللي قولتلي عليها؟؟

someone in life said...

راجي
شكرا لقبولك التاج .. طالما جاوبت علبه خلاص .. نحياتي


بنت القمر

مبروك المدونه الجدبده مدونه المكياج علي الصفحه الرئيسيه للمدونه علي الجانب الايمن اسمها ماي تاتش ،، تحياتي

Badran said...

عزيزتى
لم تحددى العشرة اشياء هل ترينها مزايا ام عيوب ! فلنعيد تقييمها لو كان لى هذا الحق . . وان سمحتى بذلك
اولا : الوحدة : والوحدة خير من جليس السوء . . وما اكثرهم فى هذا الزمان
ثانيا : الطيبة : وقد وصف الله عز وجل نبيه قائلا : لو كنت فظا غليظ القلب لانفضوا من حولك . . ووصفه عز وجل قائلا : وانك لعلى خلق عظيم . . فلا تسمعى اقوال الجهلاء المدعين ان الطيب فى الزمن ده عبيط . .
ثالثا : المسئولية الكبيرة : يقول الله وعز من قال : وفى السماء رزقكم وما توعدون . . كذلك قال : وما من دابة فى الارض الا على الله رزقها . . ولكن وجب عليكى الدعاء كقول نبينا عليه افضل الصلاة والسلام : اللهم لا تكلنى الا نفسى طرفة عين
رابعا : عصبية : ومين اللى قال انك لازم تبقى كاملة ؟ الكمال لله وحده . . شوية عصبية مع قلب طيب يبقى مش بطال ابدا
خامسا : متصورة لما تكبرى شوية هاتبقى دى المشكلة ؟ اامنتم من فى السماء ان يخسف بكم الارض ؟ ؟ مش بعد شوية ده على طول وفى اى وقت . . قولى يارب
سادسا : مش جميلة : ان الله لا ينظر الى وجوهكم بل ينظر الى قلوبكم
سابعا : الظلم : يقول نبينا عليه افضل الصلاة والسلام : المؤمن القوى خير من المؤمن الضعيف . . ويقول الله عز وجل : فتزودوا فان خير الزاد التقوى
ثامنا : مجنونة . . هكذا يراك الاخرون . . وبين العبقرية والجنون شعره . . فهل يراها الاخرون ؟ ؟
تاسعا : المدينة النظيفة : هى الجنة وليس مكان على الارض . . فابحثى عن القلوب النظيفة والنوايا النظيفة فالجواهر والذهب تطمسها الحجارة والوحل . . واللؤلؤ فى قلب المحار فى اعماق البحار وليس فى الشوارع النظيفة
عاشرا : السفر : فى السفر سبع فوائد . . احدها الوحدة . . فلا تعتبريها مشكلة . . فقد اتفقنا ان الوحدة خير من جليس السوء
فهل احسدك على النعم التى اختصك الله بها ؟ ؟ وقد قال تعالى فى محكم كتابه : انما يبلوكم ليرى ايكم احسن عملا . . وقال ايضا وبشر الصابرين . . وقال كذلك : ادعونى استجب لكم
تحياتى

someone in life said...

Badran

Thanks for your advises .. Regards

روابط said...

طب انتى عايشة لوحدك, الدور والباقى على انا عايش وسط ناس بس برضه لوحدى
شراء ملابس وقرارات لوحدك عادى مش معناه عيب فى شخصيتك ابدا
رابعا كلها تنطبق على انا كمان فافتكرى انه nothing free
مشكلة الدفن متحمليش همها هتكونى ميتة وقتها
انا ذوقى فى اللبس وحش وكل الناس بتقولى انه وحش
انا كمان نفسى اعيش فى مدينة نظيفة ونفسى كمان اسافر كتير يمكن القى نفسى

تحياتى

ماء تشرين said...

دى اول زيارة ليه هنا وشدينى اووى اسم مدونتك
وقريت الموضوع حلو اووى انك وجهتنى نفسك بالحقائق ياريت كل الناس تعمل كده
رد جميل اووى bdranوعلى فكره عجبنى وفعلا انا متفقه معاهم الوحده مش عيب بالعكس هى فعلا صفاء للذهن

someone in life said...

حازم سويلم

اهلا بيك انت ازاي وحدك اكيد عندك عيله و بالنسبه لذوق الملابس امرها سهل شوبه تدريب او ممكن يكون رأيهم غلط و فكرة اكون ميته صحيح بس اكرام الميت دفنه و القراءة و الدعاء له و الا ده كمان هاتحرم منه ؟



ma2tshren

اهلا بيكي و ان كنت مش عارفه اقرأ اسمك انا دائما باواجه نفسي و اقسو عليها قوي و فعلا الوحده احسن من الحياة مع ممن لا تحب لكن احيانا الملل بكون قاتلا

تحباتي

Anonymous said...

صديقتى العزيزة
المرهفة

كم شعرت بك بشدة
وبمدى الالمك واحزانك ووحدتك

بعد قراءة كلماتك

ادركت منذ البداية انك تعرضت للكثير من الظلم بسبب طيبة قلبك

فقد كانت تعليقاتك لدى قبل افتتحاك لمدونتك

تصرخ بهذا
اظلم لان قلبى طيب

لم ادرك مدى تأثرك ببوست كلمات حمقاء بهذة الطريقة

لانك حاولت ان تخرجينى مما انا فيه بتشجعيك لى بالتعليق

ولم تذكرى شئ عن احساسك

وان دل هذا على شئ فهو على طيبة قلبك

حاولت تشجعيى بينما كلماتى تحفر الما بداخلك

صديقتى
ان ظننت ان احدا لن يأتى - طبعا بعد الشر عليك -

فتذكرى ان لا فارق من يحضر ومن لا يحضر

المهم النهاية فى ايا العالمين
لاننا سنكون بين يدى العدل

قد يحضر شخص ما سرادق عزائة امما من الخلق

وينتهى به المطاف بالنار

والعكس صحيح

ما احاول انة اقولة انا
لو حضر شخص واحد فقط
يحبك بصدق

افضل الف مرة من قاعة مليئة بالنافقين والمجاملين

كل الحب ليك

someone in life said...

شيرين

الطيبة الأن اصبحت عيبا في هذا الزمن انا ظلمت في حياتي الشخصية و العملية بسبب الطيبة التي يظنها الناس هبل مع انها رحمة لكن من يقدر هذا .. نعم تأثرت بالبوست جدا و لكن ليس معناه ان ازيد ألمك انت مازلت صغيرة على الألام فقط لا تثقي في أحد بسهولة .. تحياتي

Anonymous said...

someone in life عزيزتى

لو كان الجمال جمال الوجه لكان من الأفضل لكل واحد أن يشترى تمثالا جميلا ويجلس للفرجة عليه

الحقيقة أن هناك ألوان كثيرة .. فيها الذوق وفيها العقل وفيها التسامح الذى تعتبريه عيبا .. مع انه فى نظرى هو اقيم شئ فى الانسان .. ولاتصدقى عزيزتى غير ذلك

احيانا لايرى الانسان بوضوح كيف الحل .. لكن المؤكد انه عندما يجئ يتعجب .. فالزمن كفيل بذلك .. تلك هى الحقيقة

ثم من قال انك لوحدك ؟ أمال كل اصحابك دول بيعملوا ايه ؟

someone in life said...

شريف
اصحابي هنا عبر شاشة لا اعلم عنهم و لا يعلمون عني انا اتنفسهم هنا فقط .. نعم سيدي الجمال مهم جدا انا فقدت معظم حياتي لفقدان هذا العنصر فقدت أناس اعزاء علي قلبي لانهم يريدون الاجمل و الابهي و سمعت بأذني و قرأت بعيني اني
لا اسوى شئ بدونه
أما باقي الأشياء من تسامح و خلافه لا تنفع الأن في هذا الزمن و اسأل مجرب .. تحياتي

freedom said...

يا ترى هوه الموت انعمل عشان نرتاح ولا حد يقرا الفاتحة علينا.. بس و لا يهمك.ز انا تقريبا بعيش نفس وضع الوحدة بس مبسوطة فيه كتير.. انا بريح نفسي و لا اجيب حد يغلبني

someone in life said...

Freedom

يا عزيزتي يبقى من الانسان ذكراه و محبته في قلوب الناس و الدعاء له بالرحمة فلو ليس لدي ذكري و لا من يدعوا لي شئ مؤلم هذا ما أظنه
و من قال الموت راحة ؟
اتمني ان لا تعيشي مثلي ربنا يملا حياتك بهجة و فرح .. تحياتي