شوال البطاطس

حد فيكم راح يشتري مرة اي حاجة من السوق ؟

قدامه أشكال و أنواع في شوال او في قفص

مد ايده و قلب شمال و يمين و دي رماها علي جنب و دي شكلها مش عاجبة و دي بوظها بايده

و في الاخر يمكن يشتري او مايشتريش حسب مزاجه و يمكن اللي يشتريه يطلع طعمه مر و ماسخ

بس هو عجبه شكل و بس

انا بقي تعبت أكون جوا شوال البطاطش دة ... شوال الدنيا

كل واحد و لاواحدة تبص في خلقتي و تلوي بوزها

اصلي مش عاجبة سعادته و لا سعادتها

تعبت أكون في سوق الجواري لمجرد طلب طبيعي جدا أقرة مجلس حقوق الانسان

ان يكون لي حد يسال عني أو ارتبط بانسان مناسب

اتحطيت جوا شوال البطاطس و كل واحد بينقي فيا شويه ... قصيرة لا مش عاجباني

شعرها مش عارف ايه مستواها عامل ايه لا عاوزها تخينه لا رفيعه

محجبه لا تشيل الحجاب

اهلا الله انت امورة طيب بتدخني ... لا

طيب بتشربي ... لا

انت معقدة و لا ايه؟

اهلا الله مخك متفتح بس عاوزك تطولي شويه و تسيبي ابنك يروح في داهيه

و لا اقولك ايه رايك نبقي اصحاب شويه الاول

كل واحد من الساده المتفرجين لو بص لنفسه في المرايه قبل ما ينزل او شاف اللي لابسه

و لا حتي مستواه الاجتماعي اللي قارفني بيه انه محصلش و ابن فلان و علان

و يمكن يكون بيتهم ناقصه صابون و شامبو و حتي كلونيا مش بارفيوم

او فاكر ان حساب سعادته في البنك هو ده الحلم

طيب ليه انا مش اعتبرتك جوا شوال انت كمان و ممكن استحمل عيوبك البشريه العادية؟

هما اولاد الناس الطيبين راحوا فين؟

و ليه الكل دلوقت بيوعد و مش بيوفي بكلامه بس شاطر يقول و يدعي ابن الناس اللي ماحصلش

انا زهقت من شوال البطاطس اللي محشورة فيه

و زهقت من المثل العليا و القيم و كل حاجه

زهقت من كل حاجه