شبة الرجل

اكيد كلنا درسنا في مادة النحو حاجة اسمها في الاعراب خبر شبه جملة و هو عادة بيكون جار و مجرور او مضاف اليه يعني حاجة ناقصة مش كاملة شبه الخبر مختلف تماما عن الخبر المفرد اللي مالي مركزه من غير مساعدة او الخبر الجملة اللي بيكون جملة اسميه او فعليه ليها كل أركانها و بتعرب كأي جمله يعني حاجة كدة ليها مركزها زي ما بيقولوا كدة قيمه و سيما

زمااااااااااااااااان كنت بشوف الرجل كامل مش شبه رجل .. مش مضاف اليه و لا مجرور محتاج اداة جر علشان تديله قيمة و موقع من الاعراب

حاليا الرجل اصبح شبه جمله و شبه جمله ممسوخه مالها معني حتي في وسط الجمله

الرجل اصبح تابع بعد ما كان صاحب قرار .. انا لا ادعي لتسلط الرجل لان يمكن اللي حصله دة من كثر جبروته و لما تكبر زاد طغيانا

الرجل بيعمل اعمال كثيرة في الخفاء لانه مش قادر يصرح بمكنوناته بمعني انه لا يحب امرأته و لا يسعد معها فيلجأ للابواب الخلفيه بكل طرقها لانه خايف .. خايف يقول ان الشرع و الله حلل ليا جواز تاني لو انا مش مرتاح في الاولاني لكن لا اخترع موضه جديدة اسمها الجيرل فريند .. ليه .. ما هو المجتمع و الدين يبيح التعدد .. ظاهرة الجيرل فريند زادت قوي اللي مهما كان عقلنا مفتوح و متقبل لثقافات اخري الا انه في النهايه زنا

الجواز العرفي اللي بدون عقد و لا بيت زوجية و مجرد خطف ساعات يوميه او اسبوعية موضه برضه لان البيه بيخاف من المدام لتقلب عليه الدنيا و تجردة من اللي وراه و اللي قدامه

سي السيد ابو شنبات بيحب و يعشق بس ما بيصرح و يقعد يشكي انه اتعس انسان في العالم طيب خد خطوة في حياتك الرد لا اصل المدام و العيال

الشبه رجل بيخفي الزوجه الثانية و الجيرل فريند اختراعه العظيم و الحبيبه خلف الابواب الخلفية ,, هو عايش حياته في بيته و مراته عارفه او مش عارفه مش حكايه ما هي اللي مسيطرة عليه و بتتحكم فيه و يوم ما تعرف ينكر المعرفة او يقدم الاعتذار علي مذبح الزوجيه المهدم

الشبه جمله .. الشبه رجل في حبه و شغله و حياته شئ ناقص مالوش لازمه و الست اللي بترتبط براجل شبه جمله بضيع حياتها و حقوقها لانها في الاخر هي اللي عليها اللوم هايقولوا عليها كثير و مش هايرحموها و هاينسوا ان شبه الرجل هو اللي صور الدنيا جنة و هو مش معاه اي مفتاح من مفاتيح حياته اصلا لانه اسم مجرور و لانه مضاف اليه