عندي مليون لية بتضرب في راسي طول شهر رمضان
فقراء المسلمين واقفين امام الجوامع و بيوت الاغنياء و لا الشحاذين
ليه مش باشوف ده قدام أي كنيسة؟
يعني ما فيش فقراء مسيحيين و لا هو التنظيم و عدم خدش حياء الفقير و اذلاله
الباعة المتجولين بعرباتهم و احصنتهم و ما تفعله في الشوارع و مخلفاتهم من الاطعمة المتبقية امام ابواب الجوامع و يختلط ندائهم و ألفاظهم
القبيحة بأصوات الأذان او صوت الخطبة و الصلاة
ليه مش باشوف اي عربية من دول و لا أي بني أدم منهم امام أي كنيسة ؟
هما الأخوة المسيحيين مش بياكلوا زينا و لا الكنيسة بيت ربنا و الجامع لأ . بصراحة احنا اللي بنشجعهم علي التجمع حول بيت الله المعمول اصلا للصلاة و التعبد
اولاد الجيران استغلوا اخر اسبوع قبل الاجازة و قضوها لعب في الشارع و اصواتهم عاليه جدا في وقت ما قبل الافطار
ليه مش بنعلم اولادنا احترام الاخرين و ليه رامينهم علي الناس بوقاحتهم و قله تربيتهم ؟
أصوات المؤذنين و قارئي القرأن اثناء صلاة التراويح عاليه جدا و لا تفهم ما يقول
ليه ما حدش قالهم ان أنكر الاصوات لصوت الحمير و ان المؤذن لازم يكون صوته معقول مش يحط المايكرفون في بقه و يصرخ كمان الدين بالحسني مش بالصراخ
رغم ارتفاع اسعار معظم السلع الغذائية
ليه الناس مقبلة علي الشراء و كأنه اخر يوم ياكلوا فيه مع ان الشهر الفضيل شهر ادخار و عدم استهلاك وبعدين يجروا علي دكاترة الرجيم
ممكن تدفع في شراء شقة مبالغ عاليه و بعد فترة تحس بالقرف منها
ليه قادرين نحول احسن المناطق السكنية الي مناطق شعبية او عشوائيه في خلال شهور
كان زمان ملابس الطبقه الشعبية جلابية واسعه و طرحة شعر للستات و جلابيه للرجاله
ليه دلوقت بقي اللبس الشعبي الحريمي عبارة عن دورين او ثلاثه
يعني جيب و بلوزه و خمار او عبايه و خمار او حاجة زي مفرش السفرة
مالها الجلابية الوسعه و الطرحة عمرها ما فصلت ملامح و ليه النقاب فوق الخمار مع ان معظم المصريات خاصة من هذه الطبقة المعدمة غير رائعات الجمال و لا بهن اي فتنة لان كلهم بيعانوا من الانيميا الحادة واوعوا تقولوا سنة يا ريت يراعوا السنه اولا في النظافة الشخصية او في نظافة المكان و لا اللسان
كلمات كلمات دون التزام بأي وعد او مراعاة للشعور
ليه بنهين الكلمات قوي و مش بنحترمها مع اني كنت اسمع ان الكلمة وعد و الكلمة شرف
