Saturday, August 30, 2008

هدية من مصر --- برص

ارسل لي صديق ايميل به بعض الصور ظننت انها صور رحلته الي مصر و لكن ماذا كانت ؟
صورة لحيوان البرص وجده داخل حقيبة ملابسه مع العلم انه كان يقيم في فندق خمسة نجوم
كيف دخل هذا السيد البرص المحترم الي الفندق و الحقيبة ..الله اعلم
المهم انه امسك به و اطلقه في حديقة المنزل متمنيا له ان يجد طعاما و ان يتعايش مع البيئه الباردة بالخارج
بصراحة منتهي النظافة و الكرم !!!
خلال تجوالي مع صديقي واجهت عجائب من الممكن في خلال عشر سنوات ستقضي علي مهنه السياحة في مصر
اولا الهرم . الدولة منظمه المكان جيدا من حيث الدخول و البارك لكن ما ان تدخل الا يمسك في رقبتك المسئولين
عن الاحصنة و شرح تاريخ المكان من هنا يبدأ النصب لحد الوقاحة . في بادئ يقنعك ان هذا عملة و ان الشرح و الخدمة
مضافا لتذكرة الدخول و لكن الهدف الاستنزاف التام لركوب حصان او جمل و في النهايه الذي تراه مترجلا لا يختلف عما فوق الحصان
لانه ممنوع تعدي بعض الاماكن
نظرا لحرارة الجو قررنا ن نتناول الطعام و الراحة قبل الذهاب للمتحف بعد الطعام في احد مطاعم الوجبات السريعة و نظرا
لعشقي للقهوة و بما اني لا اعلم الكثير في منطقة التحرير ذهبنا الي جروبي و ياريتني ما ذهبت
المكان قديم للغاية و غير مطور مع انهم طوروا الامريكين المهم بعد نداء النادل خمسين مرة تعطف و تكرم لاخذ الطلبات
و لكن اكتشفت انه ياخذ طلبات الصاله كلها و ينفذها كلها في وقت واحد ايضا و ببلادة شديدة حتي الكبايات غير نظيفة
و اخطاء فاتورة الحساب بصراحة كان اسوأ فنجان قهوة في حياتي يا ريتني كنت ذهبت لكوفي شوب امريكاني و خلصت
غلطانه لازم امشي بخريطة
المتحف يا سيدي يا سيدي احلي من الساونا السويدي .. رطوبه و درجة حرارة تخنق عدم وجود تكييف الا في حجرة كنوز
توت عنخ أمون قضينا هناك ثلاث ساعات نتصبب عرقا مع ان ثمن التذكرة من الممكن ان يفي بتركيب تكييفات لكل القاعات
معظم المعروضات ايضا تفتقد ورقه لشرح المعروض وان وجد ورقه صغيرة جدا بالعربية و الانجليزيه اظن انها مكتوبه في
االثلاثينات من ايام ما كانوا بيقولوا نهارك سعيد و سعيدة مبارك .. المفاجأة الاكبر الاخوات المرشدات السياحيات حدث و لا حرج
علي الاجساد المتغدية علي حلل المحشي و عدم تناسق الملابس و عدم وجود اي ابتسامه علي وجهها كان السادة و السيدات المرشدين السياحيين في منتهي الاناقة و اللطف - كان في الزمن الجميل
طبعا الباخرة النيلية و حديقة الأزهر الاقل مشاكل نظرا لانك تدفع فاتورة محترمه فعلي الاقل ستجد ابتسامه
المطار الجديد نهاية مطاف الرحلة لا توجد اي اشارات للبارك او اي مساعدة من احد و عليك ان تلف السبع لفات يعني مشروع
تكلفته مليارات بدون ارشادات يمكن فاكرين ان المصريين لا يعرفون القراءة
اخيرا امس قررت ان اذهب لكارفور العبور الجديد مع صديقة لشراء بعض الاطعمة نظرا لاي اعمل طول الاسبوع
و لا وقت للشوبنج ..و كانت غلطة عمري
جحافل من الجلاليب و الشباشب و السيدات من النوع التقفيل السعودي و رائحه عرق لا تطاق و اطفال كثيرون جدا يبدو ان السوبرماركت
اصبح نزهه العائله المصريه و طبعا صراخ و خناق و الموظفون غير متعاونون بالمرة .. اللي انا مش فاهماه ماله دكان عم عبده
البقال ( ابني ذو 12 ربيعا قال لي مرة يا مام ده للتفاخر علشان الجيران يعرفوا انهم بياكلوا من كارفور او سبينيس مع ان السعر
ممكن يكون عالي على دخل بعض الاسر ) المهم اني لم اكمل المشتريات و قررت الرحيل فورا وعدم العودة مطلقا
لا يلزمني هذا الزحام لاني غير استهلاكية بالمرة ...
بس سؤال حيرني مش لاقيه اجابة هو ليه النقاب بقي كتير قوي كدة هو احنا بقينا وهابيين قوي كدة
ماله الحجاب فقط و باناقة غير مفرطة صديقتي قالت لي بكرة يضربوا الناس في الشارع زي السعودية و نساق كما الاغنام ( علي فكرة صديقتي محجبة لتقولوا عليا كافرة في رمضان و لا حاجة )

25 comments:

جسر الى الحياة said...

الله ماهو لازم ياخد تذكار من مصر
واحمدى ربنا انه برص مش فار متربى على الغالى
ثانيا كل شىء فى مصر اصابه الاهمال حتى القطاع الخاص وكان الحياة ماشية وخلاص تحصيل حاصل يعنى محدش مستوعب ان كل حاجة فى الحياة بنعملها هى مقدمات وما يليها هو النتيجة ولازم نفوق شوية
ل سنة وانتى طيبة يا حبيبتى كلها ايام ورمضان يشرفنا دمتى بحب ومودة

maxbeta3zaman said...

ذكرتنى هذه بالأبراص التى تملأ بيتنا القديم بالعجمى تركناه 15 سنة وسكنا سموحة لكن ابنى الكبير تزوج فيه منذ شهرين وفشلنا فى القضاء على مجموعة الأبراص التى دخلت من الألوميتال وتستقر وراء الستائر زوجة ابنى تخاف وتفزع جدا كلما رأت واحدا يطل عليها من وراء الستار أو يستقبلها عند باب الشقة هو غير مؤذى لكن لونه الوردى وزحفه على الحائط لا يبعث على السرور خصوصا لعروسين فى شهور العسل ... استعى للفيلا كل أسبوع لسد الثغرات ولصق اللصاق وكأنى المسئول عن تواجدهم هناك آخر النصائح هى وضع الشيح فى صرر علها تطفش عائلة الأبراص التى وضعت يدها على منزل العجمى دو إذن
أنا بلوجاوى حديث جدا وصديق قديم جدا لشريف الذى أدخلنى هذا العالم ويسرنى تشريفكم لدكاننا المتواضع الذ يحمل اسم ماكسبتاعزمان

بنت القمر said...

فكرتيني بفيلم بتاع ماجده لما كانت مرشده
وكانت مضربة عن الجواز:))
الله يحظك طي تصدقي انا بكره كارفور ده عمي زحمه وخنقه والرخيص صلاحيته فاضلها اسبوعين والباقي غالي موت مالو :))عم عبده بجد
تحياتي

blackcairorose said...

عزيزتى

بالضبط الحاجات دى حصلت لى من كام سنه برضه وكنت بستقبل ضيوف اجانب فى القاهرة، والله فى مواقف كنت فى نص هدومى ويمكن حكيت موقف منهم فى تعليق مرة لما كنت فى منطقة ابوالهول والجو حار وبنشرب حاجة ساقعة من واحدة بنت صغيرة بتبيع فى جردل

جه امين الشرطة وبيزقها بايده بالجامد من هدومها وناقص يضربها وهى عماله تعافر وهتعيط وانا معاية ناس اسكندنافيين يعنى قمة الاحترام والاخلاق ومش مصدقين وبيسألونى هو فيه ايه

امين الشرطة قاللى ممنوع البيع فقلت له طيب بشويش على البنت دى صغيرة وميصحش الطريقة دى وخصوصا ان فيه اجانب ، طبعا انا عايزاه يبطل اهانة فى البنت حتى لو كانت الحجة هى الاجانب

فراح قايلى ما معناه وانتى مالك انتى

طبعا قلت اسكت لحسن انا كمان اتهزأ بالمرة بس بجد كان موقف زفت، غير طبعا بتوع الجمال والاحصنة هناك دا موال تانى

طيب انت بتقولى جروبى اللى حالته متهالكه وقطاع عام، احنا رحنا فلفلة اللى فى الهرم ونوعية الاكل كانت قمة فى السوء وتحسى انهم من كتر الزحمة والافواج السيايحية اللى بتروحلهم بيحطوا اى حاجة على اى حاجة والسياح طبعا هياكلو باعتباره اكل مصرى وخلاص

عندى الف نادرة من الزيارة دى اللى استمرت عشر ايام ميتنسوش

الواحد بيقعد يعتذر للسياح ويحاول يلاقى تبريرات او شرح للظروف، واصحابى كانوا بجد محترمين الاحترام اللى يكسف من غير ما يقولوا كلمة مسيئة او حاجة سلبية

لما كنت بشوف رد فعلهم ده بقول فى نفسى ياه قد ايه احنا فينا حاجات كتير وحشة

Unknown said...

برص؟؟ يا لهوي!!!

طيب عادي ليه مزعله حالك؛ أنا بتزكر مره قريت عن وحده أمريكيه لقت في شنطتها لما رجعت من البرازيل "ثعبان" أنا شايفه البرص أرحم يعني

موضوع المظاهر الدينيه هاي صايره حتى هون في الاردن؛ ما خلاص الواحد صاير يتقيم بلبسه قبل اي شي آخر
و ع فكره أنا محجبه انا كمان احسن لا حد يحكي

كل سنه و انتي سالمه

goodman said...

شىء مؤسف فعلا
السياحة فى مصر تعانى الكثير
ومصر تعانى كلها بشكل عام
على فكرة ليكى عندى تاج
اتمنى ان تقبلية

صباح الخير يا مصر said...

someone in life
****************
المهم اني لم اكمل المشتريات و قررت الرحيل فورا وعدم العودة مطلقا لا يلزمني هذا الزحام لاني غير استهلاكية بالمرة
-------------------
انا فعلت ذلك قبلك و يمكن لو قرأتى اول بوست نزلته ها تعرفى السبب
فمازال كارفور يبيع المنتجات الدانمركيه و التى احسست معها اننا لم نعد فى حساباتهم كعملاء يجب احترامهم

وكل عام و انتى بخير و اتم صحه
و رمضان كريم

someone in life said...

جسر الي الحياه
نعم الاهمال في كل شئ بقي شئ يكسف حتي الاهمال كمان في الاخلاق

كنا احسن شعوب الارض و بعدين احسن الشعوب العربية فقط و الان نحن لا شئ

تحياتي

someone in life said...

ماكس بتاع زمان

اهلا بالزمن الجميل ... و الله الابراص و النمل بقت افة بنحاربها و نشم مبيدات بسببها
نورت عالم البلوج و انشالله تمتعنا زي استاذ شيرين

اهلا بيك

someone in life said...

بنت القمر

ايوم انا اخدتها من الاخر و روحت اشتريت من سوبر ماركت عادي ما هو نفس الاكل احنا بس اللي عندنا عقدة الخواجة تحياتي

someone in life said...

black Cairo rose

مش هاقولك اني في نص هدومي لا د انا في الربع الاخير منها بس اعمل ايه
طبعا هو قبل ما يجي واخد فكرة ان مصر مش نظيفة لكن هو عداها علشان خاطري و انا كنت حريصه اني اتفادي اماكن زحمه لان شخصيته مش تتفق مع كده بينما انا ليا صديق سويسري كان بيعشق الجماليه و الغوريه و الاماكن الشعبية و اخيرا اتجوز من حواري القدس
لكن ده مختلف فعلشان كده حاولت بس للاسف الاستاذ برص بوظ الدنيا
تحياتي

someone in life said...

مياسي

اهلا بيكي الملبس ده جديد علينا بقينا بنقلد دول تانية انا عندي حكايات كتير في الموضوع ده بس ساكته لانهم ممكن يكفروني او يرجموني

احنا قربنا ندخل عالم الخرص الابدي

تحياتي

someone in life said...

جود مان

شكرا علي التاج هاحاول ارد عليه في اقرب وقت

تحياتي

someone in life said...

صباح الخير يا مصر

انا فاكرة بوست حضرتك كويس
انا رايحه كارفور و عارفه انا باشتري ايه منتج مصري انا كنت باحب زبده لورباك لكن مش باشتريها دلوقت خالص و باجيب زبده فلاحي من عند ام احمد للاكل و الطبيخ بس الفكرة انا كنت محتاجة حاجات كتير في وقت واحد قلت اوفر وقت لكن الجحافل الشعبية خلتني اتراجع للخلف انا و صديقتي

علي فكرة يا تري بتقاطع المنتجات الامريكاني كمان

تحياتي

Anonymous said...

كل سنه و انتي طيب و بالصحه و السلامه و رمضان كريم ياجميل

صدقيني كل اللي بتتكلمي عنه و اكتر موجود و لا الناس داريانه ان كل ده بيهدد السياحه
بخصوص الخدمه اللي مش و لابد في جروبين
:)
شوفي يابنتي للأسف عندنا في الكافيهات مش عارفين الف باء الضيافه يعني ستار باكس اللي مفروض كافيه ابن ناس و مفروض الخدمه فيه تبقي ميه ميه و تجيلك الطلبات اول ماتطلبيها صاحبتي قالتلي شتات بين ستار باكس اللي هنا و ستار باكس اللي في السعوديه
يعني طلبنا من اللي هنا حاجات حطوا حاجات احنا اساسا ماطلبنهاش و هناك في ستار باكس السعوديه بيعملوا يوم الجمعه من كل شهر دوره تدريبيه مش للعاملين بس لأ لأي حد عايز يتعرف علي كيفيه عمل القهوه شوفتي الفرق بينا و بينهم
هنا اغلبيتهم بيتخرجوا من اي حته و مش عارفين طريقه معامله الزبون ازاي و تلاقيه بيخدمنا بقرف و مش طايق نفسه
ناهيكي بقه عن قله الذوق يعني مثلا في الشغل عندي روحت اجيب من البوفيه علي الساعه 3 الا تلت عصير لاقيت واحد عمال يردحلهم و يقولهم هاتولي شاي و ازازه ميه و كانوا قافلين الازاز اساسا فتحوله و جابوله اللي هو عايزه و انا واقفه مستنيه يخلص و اطلب طلبي تفتكري اللي واقف قاللي ايه؟قاللي مابنبعش دلوقتي
يعني انا لو لساني طويل و اقوله اشمعني حيجيبلي زي البوبي بس انا خدتها من اصيرها و مشيت و دمي كان محروق
طولت عليكي سامحيني
حبيت بس احكيلك شويه حكاوي و ابتسمي انتي في مصر ماتستبعديش اي حاجه و بخصوص زياده عدد المنقبات و النبي يااختي لما تعرفي السبب ابقي قوليهولي عشان انا بسأل نفس السؤال
:)

تحياتي ليكي و كل سنه و انتي طيبه ياجميل و سامحيني علي التطويل

mina said...

كويس انها جت سليمة فى برص يعنى ... مكنش حيوان لطيف من الحيواناتت المنزلية الاليفة بتاعت مصر

Mustafa Şenalp said...

çok güzel site. :)

Anonymous said...

الحقيقة الموقف ده فكرنى باول يوم وصلت فيه قاعدة لاكلاند فى امريكا

الاستراحة كان فيها صراصير .. صدقى او لاتصدقى

انا طلبت قائد القاعدة الادارية ليلتها وطلبت العودة لمصر فورا مع التهديد بكتابة تقرير كامل للملحقية .. جمعوا المستجدين الاجانب عشان يجهزوا لى استراحة تانية مع كل الاعتذارات الممكنة وفى الآخر هدأت لما جهزوا التانية وخلوها تبرق

ساعات أسأل نفسى مالى كنت زعلان قوى كده .. والآن فهمت انها عقدة اسقاط .. وماصدقت

سمراء said...

هو مين مكن حقه يكفر مين ومين من حقة يحكم على التاني
اؤكد لك ان مرتيات النقاب لا يعرفين ما هي الوهابية
اوؤكد انهم يريدون ارضاء ازواجهم وعائلاتهم الذين فرضوا عليهم ذلك

انا معهم واوافق على ذلك لو اختيار مدروس


كل سنة وانت طيبة ويعود عليك الايام بخير انت واسرتك
سمراء

someone in life said...

اجندا حمراء

اهلا بيكي و لامتي هانضحك علي نفسنا و ليه الاماكن الحيويه مش تتجدد و تدر دخل علي الناس و ليه مش نهتم بالسائح و غيرة انا شايفة ان معظم الناس عوزة تهاجر
اما النقاب مش عارفة ليه سبب غير نوع من الهروب و نوع من الاهمال كمان للاسف انا لا اثق في هؤلاء
تحياتي

someone in life said...

mina ya mina

و تفرق ايه اهل بيته كانوا بيصرخوا لما شافوة و ليه بنزيد كراهية الاخرين لنا شويه بسلوك و شويه بقلة النظافة

تحياتي

someone in life said...

mustafa senlep

hos galdiniz efendim , cok tesekur ederim

someone in life said...

sherif

المدافع الجميل عن الوطن يعني لاقيت صراصير في امريكا عموما ده موطنه الاصلي اما الاستاذ برص اخد فيزا لبلجيكا ببلاش

ليه يا ربي مش كنت سحليه ههههه

تحياتي

someone in life said...

سمراء الجميله

اهلا بيكي و شكرا على روحك الطيبة لكن فيه بعضهم مجبر فعلا و البعض الاخر متشدد جدا

ربنا يرحمنا

تحياتي

soly88 said...

المصريون اصيبوا بحاله من التصحر
مصر اصبح كل شيىء فيها شبه الشيىء لكن مش هوه
يعنى الميكانيكى بقى شبه لكنه لايفهم فى ميكانيكا السيارات لكن معاه عده وهكذا السباك والكهربائى حتى الطبيب
وكذلك مصر فيها النيل والهرم لكنها لم تعد مصر